ចាប់ខ្លួនមនុស្ស២នាក់ពាក់ព័ន្ធនឹងគម្រោងការណ៍ភេរវកម្មនៅប៊ែលហ្ស៊ិក

អាជ្ញាធរប៊ែលហ្ស៊ិកបានឲ្យដឹងនៅថ្ងៃសៅរ៍ថា ប៉ូលិសបានចាប់ខ្លួនមនុស្ស ២នាក់ ដែលជាប់សង្ស័យថាកំពុងរៀបចំគម្រោងការណ៍វាយប្រហារភេរវកម្ម នៅប៊ែលហ្ស៊ិក។ ការចាប់ខ្លួននេះត្រូវបានធ្វើឡើង នៅក្នុងពេលដែលបារាំង និងអាល្លឺម៉ង់ ត្រូវទទួលរងនូវការវាយប្រហារភេរវកម្មជាបន្តបន្ទាប់ នៅក្នុងរយៈពេលប៉ុន្មានថ្ងៃចុងក្រោយនេះ ហើយប៊ែលហ្ស៊ិកខ្លួនឯងផ្ទាល់ក៏ធ្លាប់ទទួលរងការវាយប្រហារភេរវកម្មដ៏ធ្ងន់ធ្ងរមួយផងដែរ គឺការវាយប្រហារទៅលើព្រលានយន្តហោះអន្តរជាតិក្រុងព្រុចស៊ែល កាលពីខែមីនាកន្លងទៅ។

យោងតាមសេចក្តីប្រកាសព័ត៌មានរបស់រាជអាជ្ញាប៊ែលហ្ស៊ិក ជនសង្ស័យទាំងពីររូប គឺជាបងប្អូនបង្កើតនឹងគ្នា ហើយត្រូវបានចាប់ខ្លួន កាលពីថ្ងៃសុក្រ ក្រោយពីប៉ូលិសបានចូលឆែកឆេរលំនៅឋានរបស់ពួកគេ។

ការស៊ើបអង្កេតបឋមបានបង្ហាញថា ជនសង្ស័យទាំងពីររូបនេះប្រហែលជាមានគម្រោងការណ៍វាយប្រហារភេរវកម្ម នៅក្នុងប្រទេសប៊ែលហ្ស៊ិក ក៏ប៉ុន្តែ រហូតមកទល់នឹងពេលនេះ ការឆែកឆេរលំនៅឋានជនសង្ស័យ ព្រមទាំងទីតាំងពាក់ព័ន្ធជាច្រើនកន្លែងទៀត មិនបានរកឃើញអាវុធ ឬគ្រឿងផ្ទុះណាមួយនោះទេ។

ព្រះរាជអាជ្ញាប៊ែលហ្ស៊ិកក៏បានបញ្ជាក់ឲ្យដឹងផងដែរថា នៅក្នុងដំណាក់កាលស៊ើបអង្កេតបឋមនេះ គេក៏មិនបានរកឃើញការជាប់ពាក់ព័ន្ធណាមួយដែរ រវាងជនសង្ស័យទាំងពីររូប និងការវាយប្រហារភេរវកម្ម នៅព្រលានយន្តហោះអន្តរជាតិក្រុងព្រុចស៊ែល កាលពីថ្ងៃទី២២មីនាកន្លងទៅ។

គួរបញ្ជាក់ថា អស់រយៈពេលជាច្រើនខែមកហើយ ដែលប៊ែលហ្ស៊ិកត្រូវបានដាក់ឲ្យស្ថិតក្នុងការប្រកាសអាសន្នភេរវកម្ម។ ប៊ែលហ្ស៊ិកត្រូវបានគេស្គាល់ថាជាជម្រកដ៏សំខាន់មួយ នៃក្រុមអ៊ីស្លាមជ្រុលនិយមស្និទ្ធនឹងក្រុមជីហាតរដ្ឋអ៊ីស្លាម។ ក្រុមភេរវជនដែលធ្វើការវាយប្រហារនៅប៉ារីស កាលពីថ្ងៃទី១៣វិច្ឆិកាឆ្នាំ២០១៥កន្លងទៅនេះ ក៏មានប្រភពដើមចេញពីប្រទេសប៊ែលហ្ស៊ិកនេះដែរ។

ចាប់តាំងពីភេរវកម្មនៅប៉ារិស និងជាពិសេស ចាប់តាំងពីមានការវាយប្រហារភេរវកម្មនៅព្រលានយន្តហោះអន្តរជាតិក្រុងព្រុចស៊ែល កាលពីថ្ងៃទី២២មីនាមក ប៉ូលិសប៊ែលហ្ស៊ិកបានបង្កើនប្រតិបត្តិការប្រយុទ្ធប្រឆាំងនឹងភេរវកម្ម ដោយបានឆែកឆេរទីតាំងរាប់សិបកន្លែង ដែលគេសង្ស័យថាមានជាប់ពាក់ព័ន្ធនឹងក្រុមអ៊ីស្លាមជ្រុលនិយម៕

អត្ថបទ និង រូបភាព www.khmer.rfi.fr