លោក ហ៊ុន សែន ប្ដឹងលោក សម រង្ស៊ី និងអ្នកស្រី ថាក់ ឡានី រឿងចោទថាសម្លាប់បណ្ឌិត កែម ឡី
លោក ហ៊ុន សែន (ស្ដាំ) និងលោក សម រង្ស៊ី ថ្លែងទៅកាន់អ្នកកាសែត បន្ទាប់ពីប្រជុំ នៅមន្ទីររដ្ឋសភា ថ្ងៃទី ៨ ខែសីហា ឆ្នាំ ២០១៤។ RFA/Yeang Socheametta |
លោកនាយករដ្ឋមន្ត្រី ហ៊ុន សែន ដាក់ពាក្យបណ្ដឹងពីរដាច់ដោយឡែកពីគ្នា ប្ដឹងប្រធានគណបក្សសង្គ្រោះជាតិ លោក សម រង្ស៊ី និងសមាជិកព្រឹទ្ធសភាមកពីគណបក្ស សម រង្ស៊ី អ្នកស្រី ថាក់ ឡានី ទាក់ទងនឹងការចោទថារូបលោក និងរដ្ឋាភិបាលជាអ្នកនៅពីក្រោយខ្នងនៃឃាតកម្មលើលោកបណ្ឌិត កែម ឡី។ ការដាក់ពាក្យបណ្ដឹងនេះ ធ្វើឡើងតាមរយៈមេធាវីតំណាងរដ្ឋាភិបាលលោក គី តិច ទៅកាន់ព្រះរាជអាជ្ញាអមសាលាដំបូងរាជធានីភ្នំពេញ នៅព្រឹកថ្ងៃទី១ ខែសីហា។
លោកនាយករដ្ឋមន្ត្រី ហ៊ុន សែន តំណាងដោយមេធាវីរដ្ឋាភិបាល លោក គី តិច ប្ដឹងសុំឲ្យតុលាការផ្ដន្ទាទោសលោក សម រង្ស៊ី និងអ្នកស្រី ថាក់ ឡានី តាមផ្លូវច្បាប់ និងទាមទារសំណងជំងឺចិត្តក្នុងម្នាក់ចំនួន ១០០រៀល។
ពាក្យបណ្ដឹងដែលប្ដឹងលោក សម រង្ស៊ី ចុះហត្ថលេខាដោយលោក គី តិច បញ្ជាក់ថា កាលពីថ្ងៃទី១០ កក្កដា លោក សម រង្ស៊ី បានសរសេរនៅក្នុងហ្វេសប៊ុក (Facebook) របស់លោកថា ការបាញ់សម្លាប់លោក កែម ឡី ជាអំពើភេរវកម្មមួយទៀតរៀបចំដោយរដ្ឋអំណាច និងផ្តល់បទសម្ភាសន៍ដល់វិទ្យុអាស៊ីសេរី នៅថ្ងៃទី២៣ កក្កដា ដោយចោទប្រកាន់ដដែលៗ ធ្វើឲ្យអ្នកប្រើប្រាស់បណ្ដាញសង្គមហ្វេសប៊ុកចែករំលែកតគ្នា និងថ្កោលទោសមកលើរដ្ឋាភិបាល។
លោក គី តិច ចាត់ទុកទង្វើនេះថាជាការមួលបង្កាច់ ដែលធ្វើឲ្យប៉ះពាល់ដល់កិត្តិយសរបស់រដ្ឋាភិបាលដឹកនាំដោយលោក ហ៊ុន សែន និងជាការញុះញង់ ដែលអាចបង្កចលាចលក្នុងសង្គម និងប៉ះពាល់ដល់ដំណើរការនីតិវិធីតុលាការ។
សមាជិកព្រឹទ្ធសភាគណបក្ស សម រង្ស៊ី អ្នកស្រី ថាក់ ឡានី។ Photo supplied |
ចំពោះពាក្យប្ដឹងអ្នកស្រី ថាក់ ឡានី វិញ លោក គី តិច បញ្ជាក់ថា កាលពីថ្ងៃទី២៩ កក្កដា អ្នកស្រី ថាក់ ឡានី បានថ្លែងនៅក្នុងវេទិកាសាធារណៈនៅខេត្តរតនគិរី ថា លោក ហ៊ុន សែន នៅមិននៅ ទៅបាញ់លោក កែម ឡី អ្នកវិភាគនយោបាយ។ ដូចគ្នានឹងករណីលោក សម រង្ស៊ី ដែរ លោក គី តិច ចាត់ទុកថា នេះជាការមួលបង្កាច់ និងទម្លាក់កំហុស ដែលធ្វើឲ្យប៉ះពាល់ដល់កិត្តិយសលោក ហ៊ុន សែន និងជាការបញ្ឆេះកំហឹងមហាជន ដែលអាចបង្កឲ្យមានការចលាចលសង្គម និងប៉ះពាល់ដល់ដំណើរការនីតិវិធីរបស់តុលាការ។
ព្រះរាជអាជ្ញារង និងជាអ្នកនាំពាក្យតុលាការក្រុងភ្នំពេញ លោក លី សុផាណា ប្រាប់អាស៊ីសេរី តាមបណ្ដាញទំនាក់ទំនងតេឡេក្រាម(Telegram) ថា អយ្យការអមសាលាដំបូង បានទទួលពាក្យបណ្ដឹងរបស់លោក គី តិច រួចហើយ។ តុលាការកំពុងចាត់ការលើបណ្ដឹងនេះ ដែលលោកគឺជាអ្នកកាន់សំណុំរឿងនេះ។
សមាជិកគណៈមេធាវីនៃព្រះរាជាណាចក្រកម្ពុជា លោក សំ សុគង់ ថ្លែងថា ការប្តឹងផ្តល់គឺជាសិទ្ធិរបស់មនុស្សគ្រប់រូប ប៉ុន្តែត្រូវឈរលើអង្គហេតុ និងច្បាប់ច្បាស់លាស់។ លោកបន្តថា បើសិនជាតុលាការឈរលើភាពត្រឹមត្រូវ តុលាការត្រូវហ៊ានចាត់ការ ឬមិនចាត់ការចំពោះពាក្យបណ្ដឹង ក្រោយពិនិត្យមើលភាពស្របច្បាប់នៃពាក្យបណ្ដឹង៖ «»។
ទាក់ទងនឹងសំណងរដ្ឋប្បវេណីចំនួន ១០០រៀលវិញ លោកបញ្ជាក់ថា ដើមបណ្ដឹងមានសិទ្ធិក្នុងការទាមទារសំណងផ្អែកលើការខូចខាត ហើយក្នុងករណីនេះ អាចដោយសារដើមបណ្ដឹងមានលទ្ធភាព និងធនធានគ្រប់គ្រាន់។
កាលពីថ្ងៃទី៣០ កក្កដា អ្នកស្រី ថាក់ ឡានី សមាជិកព្រឹទ្ធសភាមកពីគណបក្ស សម រង្ស៊ី បានថ្លែងប្រាប់អាស៊ីសេរី ថា អ្នកស្រីមិនបាននិយាយថា លោក ហ៊ុន សែន ជាអ្នកសម្លាប់បណ្ឌិត កែម ឡី នោះទេ ហើយថាឃ្លីបវីដេអូជិត ២នាទីដែលគេផ្សព្វផ្សាយតាមបណ្ដាញសង្គមនោះ ជាការកាត់តសំឡេងដើម្បីទម្លាក់កំហុសលើអ្នកស្រី៖ «»។
អ្នកស្រីបញ្ជាក់ថា ក្រោយបញ្ចប់បេសកកម្មនៅខេត្ត អ្នកស្រីនឹងរកមេធាវីតតាំងតាមផ្លូវច្បាប់។
ឆ្លើយតបនឹងការប្តឹងផ្តល់នេះ មន្ត្រីជាន់ខ្ពស់គណបក្សសង្គ្រោះជាតិ លោក អេង ឆៃអ៊ាង បញ្ជាក់ថា គណបក្សនឹងរៀបចំក្រុមមេធាវីការពារក្តីឲ្យថ្នាក់ដឹកនាំរបស់ខ្លួន។ លោកយល់ឃើញថា នេះជារូបភាពនៃការគាបសង្កត់លើគណបក្សប្រឆាំង ដែលគណបក្សកាន់អំណាចតែងប្រើប្រាស់។ លោកថា បើមិនចង់ឲ្យគេចោទប្រកាន់ រដ្ឋាភិបាលត្រូវវែកមុខចាប់ជនដៃដល់ និងអ្នកពាក់ព័ន្ធក្នុងការបាញ់សម្លាប់លោកបណ្ឌិត កែម ឡី មកផ្ដន្ទាទោសតាមផ្លូវច្បាប់ឲ្យបាន៖ «»។
មកទល់នឹងពេលនេះ សមាជិករដ្ឋសភា និងព្រឹទ្ធសភាពីខាងគណបក្សប្រឆាំងជាច្រើនរូបហើយដែលត្រូវបានតុលាការកាត់ទោស និងឃុំខ្លួននៅពន្ធនាគារ ហើយខ្លះទៀតកំពុងជាប់បណ្ដឹងនៅតុលាការ។ អ្នកជាប់ឃុំរួមមាន សមាជិកព្រឹទ្ធសភា លោក ហុង សុខហ៊ួរ និងសមាជិករដ្ឋសភា លោក អ៊ុំ សំអាន។ ចំណែកលោក សម រង្ស៊ី លោក កឹម សុខា លោក តុ វ៉ាន់ចាន់ និងលោក ពិន រតនា កំពុងជាប់បណ្ដឹងនៅតុលាការ៕
អត្ថបទ និង រូបភាព www.rfa.org/khmer
លោក ហ៊ុន សែន ប្ដឹងលោក សម រង្ស៊ី និងអ្នកស្រី ថាក់ ឡានី រឿងចោទថាសម្លាប់បណ្ឌិត កែម ឡី
Reviewed by Admin
on
Tuesday, August 02, 2016
Rating: