លោក ហ៊ុន សែន ថារដ្ឋាភិបាលពិបាកកាត់បន្ថយគម្លាតរវាងអ្នកមាននិងអ្នកក្រ

កុមារដើរសុំទាននៅតាមដងផ្លូវមួយក្នុងរាជធានីភ្នំពេញ កាលពីថ្ងៃទី១៦ ខែមីនា ឆ្នាំ២០១៥។

លោក ហ៊ុន សែន ទទួលស្គាល់ថា រដ្ឋាភិបាលរបស់លោកពិបាកកាត់បន្ថយគម្លាតរវាងអ្នកមាន និងអ្នកក្រ។ ចំណែកអ្នកវិភាគសង្គមថា វិបត្តិសង្គម ឬអំពើឆក់ប្លន់កើតឡើង ព្រោះមានតែគម្លាតរវាងអ្នកមាន និងអ្នកក្រ ដែលចោទជាបញ្ហាដល់សព្វថ្ងៃនេះ។

លោកនាយករដ្ឋមន្ត្រី ហ៊ុន សែន លើកឡើងថា គោលដៅរបស់រដ្ឋាភិបាលរបស់លោក គឺកាត់បន្ថយគម្លាតអភិវឌ្ឍន៍ ប៉ុន្តែការកាត់បន្ថយគម្លាតរវាងអ្នកមាន និងអ្នកក្រ មិនអាចធ្វើបានទេ។ លោកថា លោកមិនអាចរំលាយក្រុមអ្នកមាន ដូចគោលនយោបាយរបស់គណបក្សនយោបាយខ្លះនោះទេ៖ «នៅ លើពិភពលោកបច្ចុប្បន្ននេះ មិនមានប្រទេសធ្វើកើតទេ តែងមានអ្នកមាន តែងមានអ្នកក្រ គម្លាតខាងផ្នែកទ្រព្យសម្បត្តិពិបាកធ្វើណាស់»។

លោក ហ៊ុន សែន ក៏ធ្លាប់លើកឡើងបែបនេះហើយ កាលពីឆ្នាំ២០១៤។

ថ្លែងក្នុងពិធីសម្ពោធសាកលវិទ្យាល័យក្នុងខេត្តត្បូងឃ្មុំ នៅថ្ងៃទី១១ ខែកុម្ភៈ លោក ហ៊ុន សែន ថា នៅលើលោកនេះ ក្រៅពី ប៉ុល ពត គ្មានអ្នកណាធ្វើឲ្យអ្នកមាន និងអ្នកក្រនៅលើបន្ទាត់តែមួយស្មើគ្នាទេ។ លោកបន្តថា ពេលនេះមានគណបក្សមួយចង់ធ្វើដូច ប៉ុល ពត ដែរ៖ «មាន តែ ប៉ុល ពត មួយគត់ដែលអាចធ្វើបាន កាត់បន្ថយគម្លាតរវាងអ្នកមាន និងអ្នកក្រឲ្យមកនៅដូចគ្នាទាំងអស់ គឺធ្វើរួម ស៊ីរួម កម្មសិទ្ធិសមរម្យ ស្បោង និងស្លាបព្រាមួយ»។

ទោះថ្លែងមិនចំឈ្មោះគណបក្ស ប៉ុន្តែកន្លងមកប្រធានគណបក្សសង្គ្រោះជាតិ លោក សម រង្ស៊ី ធ្លាប់ព្រមានក្រុមអ្នកមានដែលរំលោភបំពានដីធ្លីពលរដ្ឋក្រីក្រថា នឹងយកដីទាំងនោះមកឲ្យពលរដ្ឋវិញ។ បន្ទាប់ពីលោក សម រង្ស៊ី ថ្លែងបែបនេះ លោក ហ៊ុន សែន តែងតែប្រាប់ឲ្យក្រុមអ្នកមានប្រយ័ត្នខ្លួន បើគណបក្សរបស់ សម រង្ស៊ី ឈ្នះឆ្នោត។

បើទោះជាលោក ហ៊ុន សែន ថា ពិបាកកាត់បន្ថយគម្លាតរវាងអ្នកមាននិងអ្នកក្រ ប៉ុន្តែរដ្ឋាភិបាលរបស់លោកអាចកាត់ការអប់រំឲ្យបាន ដោយផែនការអភិវឌ្ឍន៍កំណត់លើវិស័យអប់រំជាអាទិភាព។ ប៉ុន្តែគេកម្រឃើញកូនមន្ត្រីធំ ឬកូនមានបញ្ចប់ការសិក្សានៅក្នុងប្រទេសណាស់ ដែលអ្នកទាំងនោះភាគច្រើនមានសញ្ញាប័ត្រមកពីក្រៅប្រទេស ហើយទទួលបានការងារល្អជាងអ្នកដែលមានសញ្ញាប័ត្រនៅក្នុងស្រុក។

ទាក់ទងរឿងនេះដែរ អ្នកស្រាវជ្រាវផ្នែកអភិវឌ្ឍន៍សង្គម លោក កែម ឡី និយាយថា បណ្ដាប្រទេសមួយចំនួន ឬប្រទេសក្បែរខាងកម្ពុជា អាចធ្វើឲ្យគម្លាតអ្នកមាន និងអ្នកក្រ ខិតនៅជិតគ្នាមិនមែនឆ្ងាយគ្នាខ្លាំងនៅកម្ពុជា ទេ។ លោកថា រដ្ឋាភិបាលរបស់លោក ហ៊ុន សែន ធ្វើរឿងនេះមិនបាន ព្រោះមន្ត្រីក្នុងជួររដ្ឋាភិបាល ក្រុមគ្រួសាររបស់លោកក្លាយជាអ្នកជំនួញ។ បញ្ហាទាំងនេះហើយដែលជារឿងដែលរដ្ឋាភិបាលមិនអាចធ្វើជា អាជ្ញាកណ្ដាលរវាងថៅកែ និងកម្មករ៖ «គាត់មិនចង់ ធ្វើ ព្រោះអីគាត់មិនមែនថា អត់ធនធានមនុស្សឯណា ដែលមិនធ្វើ មិនមែនអត់មានសេដ្ឋកិច្ចណា។ ពេលនេះអ្នកសេដ្ឋកិច្ចក្លាយជាមេជំនួញអស់ហើយហ្នឹង ដល់ចឹងទៅគាត់ (លោក ហ៊ុន សែន) មិនធ្វើទេ»។

កាលពីឆ្នាំ២០១៣ ធនាគារពិភពលោករកឃើញថា ប្រជាពលរដ្ឋកម្ពុជា ប្រមាណជាង ៣លាននាក់ ឬជិត ២០% នៃប្រជាជនសរុប រស់នៅក្រោមបន្ទាត់នៃភាពក្រីក្រ។

បើតាមលោក កែម ឡី ដើម្បីកាត់បន្ថយគម្លាតរវាងអ្នកមាន និងអ្នកក្រ ត្រូវអនុវត្តគោលការណ៍ ៥ចំណុច រួមមាន វិមជ្ឈការអំណាច និងវិមជ្ឈការថវិកាទៅថ្នាក់ជាតិ ទៅមូលដ្ឋាន រដ្ឋាភិបាលត្រូវស្រង់ស្ថិតិរបស់អ្នកក្រ និងផ្ដល់ដំណោះស្រាយ ត្រូវកំណត់ប្រាក់ខែអប្បបរមា ទាំងកម្មករ សេដ្ឋកិច្ចក្នុងប្រព័ន្ធ និងក្រៅប្រព័ន្ធ និងយុទ្ធសាស្ត្រគាំពារសង្គមត្រូវមានការធានារ៉ាប់រងអាយុជីវិតពី មន្ត្រីរាជការ ដល់កម្មករក្រៅប្រព័ន្ធ។ លោក កែម ឡី ថា គម្លាតរវាងអ្នកមាន និងអ្នកក្រច្រើន នឹងធ្វើឲ្យមានវណ្ណៈសង្គម ដែលឈានឆ្ពោះការបះបោរ។

ទាក់ទងរឿងនេះដែរ អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ ថា គណបក្សសង្គ្រោះជាតិ មិនដែលមានគោលការណ៍ធ្វើទុក្ខទោសអ្នកមាន ដើម្បីជួយអ្នកក្រ ក្នុងគោលបំណងដើម្បីកាត់បន្ថយគម្លាតរវាងអ្នកមាន និងអ្នកក្រនោះទេ។ លោកយល់ថា ដើម្បីដោះស្រាយបញ្ហានេះ ទាមទារឲ្យមានការអភិវឌ្ឍ ឬការវិនិយោគ ត្រូវពង្រីកឲ្យបានទូលំទូលាយ ពោលគឺពីទីក្រុងឲ្យទៅដល់បណ្ដាខេត្តនានា ដែលជាការបង្កើតការងារដល់ពលរដ្ឋគ្រប់ទីកន្លែង៕ ប្រភពពី www.rfa.org/khmer