គណបក្សសង្គ្រោះជាតិប្រកាសផ្តល់អំណាចទៅឲ្យថ្នាក់មូលដ្ឋាន
ប្រធានស្តីទីនៃគណបក្សសង្គ្រោះជាតិ លោក កឹម សុខា ថ្លែងប្រាប់អ្នកគាំទ្ររបស់ខ្លួននៅខេត្តកំពង់ចាម កាលពីព្រឹកថ្ងៃទី១៧ ខែមករា ថា ចាប់ពីពេលនេះតទៅ គ ណបក្សសង្គ្រោះជាតិ នឹងផ្លាស់ប្ដូរយុទ្ធសាស្ត្ររបស់ខ្លួនពីចលនានយោបាយ ទៅជាគណបក្សនយោបាយមួយពិតប្រាកដ ដោយមានគោលនយោបាយជាលាយ ល ក្ខណ៍ អក្សរត្រឹមត្រូវ ដើម្បីដណ្ដើមជ័យជម្នះ និងដឹកនាំប្រទេសនៅក្នុងការបោះឆ្នោតនៅឆ្នាំ២០១៧ និងឆ្នាំ២០១៨ ខាងមុខនេះ។
លោកក៏បានបញ្ជាក់ផងដែរថា លោកមិនដែលបារម្ភពីរឿងចាញ់ឆ្នោតនៅខេត្តកំពង់ចាម នេះទេ។ លោកថា ដោយហេតុតែលោកមានទំនុកចិត្តទាំងស្រុងនឹងអ្នកគាំទ្រនៃខេត្តនេះ លោកមិនរុញរាសោះឡើយក្នុងការសន្យាកាលពីបោះឆ្នោតអាណត្តិមុនថា បើលោកចាញ់ឆ្នោតនៅខេត្តនេះ លោកនឹងលាលែងចេញពីតំណែងអនុប្រធានគណបក្សនេះទៀតផង។
នេះ គឺលើកទីពីរហើយនៅក្នុងឆ្នាំ២០១៦ នេះ ដែលប្រមុខគណបក្សសង្គ្រោះជាតិ ធ្វើវេទិកាសាធារណៈ ដើម្បីជួបប្រាស្រ័យជាមួយអ្នកគាំទ្ររបស់ខ្លួន បន្ទាប់ពីវេទិកាលើកទីមួយដែលគេរៀបចំនៅខេត្តព្រៃវែង កាលពីថ្ងៃអាទិត្យ សប្ដាហ៍មុន។ ការជួបជុំគ្នាលើកនេះ ត្រូវគេធ្វើឡើងនៅភូមិត្រកួន ឃុំក្រឡា ស្រុកកំពង់សៀម ស្ថិតនៅចម្ងាយប្រមាណ ១០គីឡូម៉ែត្រពីទីរួមខេត្តកំពង់ចាម ហើយមានអ្នកចូលរួមប្រមាណជិត ៧ពាន់នាក់។
គណបក្សសង្គ្រោះជាតិ ធ្លាប់ឈ្នះឆ្នោតក្នុងខេត្តកំពង់ចាម នេះ ដោយដណ្ដើមបានអាសនៈសភាលើសគណបក្សប្រជាជនកម្ពុជា ចំនួនពីរ នៅក្នុងការបោះឆ្នោតអាណត្តិទី៥ កន្លងទៅនេះ គឺគណបក្សសង្គ្រោះជាតិ បាន ១០អាសនៈ ឯគណបក្សប្រជាជនកម្ពុជា បាន ៨អាសនៈ។ អ្នកគាំទ្រគណបក្សដែលមកចូលរួមក្នុងពិធីនៅព្រឹកនេះ ហាក់បីដូចជានៅតែមានឆន្ទៈមោះមុតស្មោះស្ម័គ្រនឹងគណបក្សដដែល។ ពួកគាត់មិនបានទទួលកម្រៃជាប្រាក់ ឬរង្វាន់ជាវត្ថុអ្វី ក្នុងការមកចូលរួមនេះទេ។ អ្វីដែលគាត់ទទួលបាន គឺការដឹកជញ្ជូនពីស្រុក-ភូមិ មកចូលរួមប្រជុំដោយមិនបាច់បង់ប្រាក់ និងទឹកសុទ្ធម្នាក់មួយដប ដែលគេរៀបទុករួចជាស្រេចនៅលើកៅអីសម្រាប់ទទួលពួកគាត់។
ពិធីនេះ ត្រូវគេរៀបចំឡើងនៅកណ្ដាលវាលស្រែក្បែរផ្លូវជាតិលេខ៧។ នៅចំពោះមុខអ្នកគាំទ្ររបស់ខ្លួនដែលជាតំណាងមកពីគ្រប់ស្រុក ទាំងអស់នៃខេត្តកំពង់ចាម លោក កឹម សុខា ប្រធានស្តីទីនៃគណបក្សសង្គ្រោះជាតិ បញ្ជាក់សាជាថ្មីថា អ្វីដែលសំខាន់បំផុតនោះ លោកថាគណបក្សត្រូវធ្វើវិមជ្ឈការអំណាច គឺមានន័យថា ផ្តល់អំណាចក្នុងការសម្រេច និងការអនុវត្តទៅថ្នាក់មូលដ្ឋាន មិនបាច់ចាំតែការសម្រេចពីថ្នាក់ដឹកនាំខាងលើនោះទេ៖ «បើចង់ កែ គេត្រូវកែខ្លួនឯងជាដំបូងសិន។ នេះអ្វីដែលខ្ញុំចង់ជម្រាបជូន។ កែទម្រង់ជាការធ្វើវិមជ្ឈការអំណាចជូនដល់សកម្មជនថ្នាក់មូលដ្ឋាន គោលនយោបាយមូលដ្ឋាន ដើម្បីត្រៀមទៅបោះឆ្នោតឆ្នាំ២០១៧ ពេលបងប្អូនត្រឡប់ទៅវិញ ជួបពិភាក្សាគ្នា ថាតើចង់ឲ្យគណបក្សសង្គ្រោះជាតិ ធ្វើគោលនយោបាយយ៉ាងម៉េច ដើម្បីស្រាយបញ្ហារបស់ប្រជាពលរដ្ឋ»។
ទាក់ទងនឹងយុទ្ធសាស្ត្រថ្មីរបស់គណបក្សនេះដែរ លោក កឹម សុខា ថ្លែងថា ចាប់ពីពេលនេះតទៅ ទាំងមេដឹកនាំគណបក្ស និងមន្ត្រីរបស់ខ្លួន នឹងប្រកាន់ជំហរមិនឈ្លោះ មិនឆ្លើយតបទៅនឹងការវាយប្រហារពីខាងក្រុមអ្នកនយោបាយម្ខាងទៀតទេ តែគណបក្សនឹងខិតខំរៀបចំបន្ទាត់គោលនយោបាយមួយឲ្យបានច្បាស់លាស់ ដោយផ្អែកលើតម្រូវការជាក់លាក់របស់ប្រជាពលរដ្ឋពីថ្នាក់មូលដ្ឋានទៅ។ ទោះបីជាទើបប្រកាសបែបនេះក្តី ក៏ លោក កឹម សុខា ហាក់ដូចជានៅទប់ចិត្តមិនជាប់ ក្នុងការនិយាយប៉ះពារខ្លះទៅលើអ្នកនយោបាយនៃក្រុមម្ខាងទៀតដែរ៖ «សម រង្ស៊ី កឹម សុខា ក៏ត្រៀមខ្លួនសម្រាប់ផ្ទេរការងារទៅក្មេងជំនាន់ក្រោយ។ នៅថ្នាក់មូលដ្ឋានក៏អ៊ីចឹងដែរ។ យើងមិនអាចនៅក្រាញអំណាច។ យើងមិនអាចប្រាប់ថា បើអត់ពីខ្លួនទៅរលាយស្រុកទេ។ នៅក្នុងស្ថាប័នមួយបើអត់មនុស្សម្នាក់រលាយ មិនមែនជាស្ថាប័នទេ។ យើងមិនត្រូវរំពឹងតែមនុស្សម្នាក់ទេ»។
ដូចជានៅក្នុងពិធីជួបជុំនៅខេត្តព្រៃវែង កាលពីសប្ដាហ៍មុនដែរ លោក សម រង្ស៊ី ដែលជាប្រធានគណបក្ស ក៏បានចូលរួមក្នុងពិធីនេះតាមវីដេអូខុនហ្វឺរិន (Video Conference) ពីបរទេសមក ដែលគេដាក់បញ្ចាំងឲ្យអ្នកចូលរួមបានឃើញរូបលោកតាមកញ្ចក់ទូរទស្សន៍ ប្រមាណ ៥គ្រឿង។ សាររបស់មេដឹកនាំគណបក្សទាំងពីរលើកនេះ បានរំលេចឡើងនូវគោលនយោបាយរបស់គណបក្ស ក្នុងការលើកទឹកចិត្តឲ្យមានការចូលរួមពីសំណាក់យុវជនស្រករក្រោយ។
យុវសិស្សអាយុ ១៧ឆ្នាំម្នាក់ កញ្ញា ឆេន សុផល្លែន និយាយថា នាងចង់ឲ្យគណបក្សសង្គ្រោះជាតិ ជាប់ឆ្នោតដឹកនាំប្រទេសណាស់ ត្បិតនាងឃើញគណបក្សមានគោលការណ៍ច្បាស់លាស់៖ «ខ្ញុំគាំទ្រគណបក្ស សង្គ្រោះជាតិ ព្រោះមានគោលការណ៍ច្បាស់លាស់ ដោយសារនាងខ្ញុំស្រឡាញ់គោលការណ៍ទាំង ៧ចំណុច នៅក្នុងនោះក៏មានលើកកម្ពស់យុវជនយុវតី ហើយគណបក្សនេះមានជំហរម៉ឺងម៉ាត់ក្នុងការការពារទឹកដី»។
ងាកទៅ លោក កឹម សុខា វិញ នៅចុងបញ្ចប់នៃការថ្លែងសាររបស់លោក លោកបានប្រាប់ទៅសកម្មជន និងអ្នកគាំទ្រគណបក្សសង្គ្រោះជាតិ កុំឲ្យទុកចិត្តលើគណៈកម្មាធិការជាតិរៀបចំការបោះឆ្នោត (គ.ជ.ប) ខ្លាំងពេក ខណៈស្ថាប័នមួយនេះនៅតែតែងតាំងឲ្យ លោក ទេព នីថា កាន់តួនាទីជាអគ្គលេខាធិការនៃ គ.ជ.ប ដដែល។ លោក កឹម សុខា ក៏បានរំឭកប្រាប់យុវជន និងស្ត្រី ឲ្យត្រៀមខ្លួនធ្វើជាអ្នកសង្កេតការណ៍បោះឆ្នោតនាពេលខាងមុខ ដើម្បីការពារការលួចសន្លឹកឆ្នោត៕
ប្រភពពី www.rfa.org/khmer
 |
| ប្រធានស្ដីទីគណបក្សសង្គ្រោះជាតិ លោក កឹម សុខា ថ្លែងក្នុងវេទិកាជួបជាមួយថ្នាក់ដឹកនាំមូលដ្ឋាន ស្ថិតនៅភូមិត្រកួន ឃុំអង្គួញដី ស្រុកកំពង់សៀម ខេត្តកំពង់ចាម នៅថ្ងៃទីអាទិត្យ ទី១៧ ខែមករា ឆ្នាំ២០១៦។ |
គណបក្សសង្គ្រោះជាតិប្រកាសផ្តល់អំណាចទៅឲ្យថ្នាក់មូលដ្ឋាន
![គណបក្សសង្គ្រោះជាតិប្រកាសផ្តល់អំណាចទៅឲ្យថ្នាក់មូលដ្ឋាន]()
Reviewed by Admin
on
Monday, January 18, 2016
Rating:
