មន្ត្រីនគរបាលខេត្តស្វាយរៀងថា លទ្ធផលស្រាវជ្រាវរបស់ក្រសួងមហាផ្ទៃជារឿងអយុត្តិធម៌
ឧត្ដមសេនីយ៍ទោ កឹង ឃន ស្នងការខេត្តស្វាយរៀង
រូប៖ ហ្វេសប៊ុក Koengkorn Khlrn
|
ក្រសួងមហាផ្ទៃបង្ហាញលទ្ធផលស្រាវជ្រាវបែបវិជ្ជមានមួយសន្លឹក នៃការស៊ើបអង្កេតមន្ត្រីរបស់ខ្លួនដែលជាប់ចោទពីបទពុករលួយ។ មន្ត្រីសង្គមស៊ីវិលថា ការចុះស៊ើបអង្កេតដោយមន្ត្រីក្រសួងមហាផ្ទៃខ្លួនឯង និងការចេញរបាយការណ៍នេះមិនគ្រប់គ្រាន់ទេ គឺត្រូវតែមានស្ថាប័នផ្សេងដែលឯករាជពីក្រសួងមហាផ្ទៃចុះស៊ើបអង្កេតស៊ីជម្រៅពីរឿងនេះ។ ស្នងការខេត្តស្វាយរៀង លោក កឹង ឃន រងការចោទថា ប្រព្រឹត្តអំពើពុករលួយ បក្សពួកនិយម និងប្រើកាំភ្លើងបាញ់កូនចៅឯង។ ថ្មីៗនេះ ក្រសួងមហាផ្ទៃ បានប្រកាសព័ត៌មានថា លោក កឹង ឃន មានការគាំទ្រចំពោះសកម្មភាពការងារដឹកនាំតាមរយៈការស្ទង់មតិពីបុគ្គលិករបស់លោក។
ផ្ទុយពីលិខិតអនាមិកដែលចោទស្នងការខេត្តស្វាយរៀង លោក កឹង ឃន ពុករលួយដល់ឆ្អឹង សេចក្ដីប្រកាសព័ត៌មានរបស់នាយកដ្ឋានបុគ្គលិកនៃក្រសួងមហាផ្ទៃ កាលពីថ្ងៃទី៨ មេសា ឱ្យដឹងថា រដ្ឋបាលខេត្តស្វាយរៀងទទួលយកស្នាដៃដឹកនាំ និងការអនុវត្តផែនការការងាររបស់ស្នងការរូបនេះ។
សេចក្ដីប្រកាសក៏ឱ្យដឹងដែរថា ក្រុមចុះការងារដែលចុះស៊ើបអង្កេតរកមិនឃើញបណ្ដឹងអនាមិក ដែលចោទថា លោកស្នងការខេត្តនេះ គៀបសង្កត់មន្ត្រីថ្នាក់ក្រោម និងប្រព្រឹត្តអំពើពុករលួយនៅឡើយទេ។
ចំពោះការចោទថា ស្នងការខេត្តស្វាយរៀង លោក កឹង ឃន ប្រមូលលុយពីឈ្មួញនាំទំនិញពីវៀតណាមនៅច្រកព្រំដែន សំរោង និងច្រកបុសមន ក្នុងមួយយប់ៗ មិនក្រោម ២ម៉ឺនដុល្លារនោះ ក្រសួងមហាផ្ទៃគ្រាន់តែអះអាងបែបមិនច្បាស់លាស់ថា ច្រកព្រំដែនទាំងនោះពុំអំណោយផលការនាំទំនិញចូលកម្ពុជានោះទេ និងមានសមត្ថកិច្ចចម្រុះ ៣ស្ថាប័នប្រចាំការនៅតំបន់នោះផង។
កន្លងមកនគរបាលខេត្តស្វាយរៀង ៥៧ នាក់ ចោទស្នងការនគរបាលខេត្តស្វាយរៀង គឺលោក កឹង ឃន ថា រំលោភអំណាច ប្រព្រឹត្តអំពើពុករលួយ និងទទួលសំណូកពីឈ្មួញជនជាតិវៀតណាម ជាថ្នូរអនុញ្ញាតឱ្យនាំទំនិញចូលកម្ពុជាតាមច្រករបៀង ៩កន្លែង ក្នុងខេត្តជាប់ព្រំដែនខាងកើតមួយនេះ។ ពួកគេអះអាងថា ស្នងការរូបនេះបានបញ្ជូនសាច់ញាតិឱ្យទៅគ្រប់គ្រងច្រករបៀងគ្រប់ច្រក ដើម្បីចាំទទួលលុយពីឈ្មួញជនបរទេសនាំទំនិញខូចគុណភាពចូលដោយសេរី គ្មានការត្រូតពិនិត្យពីមន្ត្រីជំនាញ។
លើសពីនេះ ពួកគេបន្តអះអាង លោក កឹង ឃន ក៏ធ្លាប់បាញ់ប្រពន្ធខ្លួនឯងឱ្យរបួសធ្ងន់បញ្ជូនទៅព្យាបាលនៅប្រទេសវៀតណាម និងធ្លាប់យកកាំភ្លើងបាញ់មន្ត្រីនរបាលជាកូនចៅខ្លួនឯងឱ្យរបួសធ្ងន់ដែរ។
នគរបាលម្នាក់ក្នុងចំណោម នគរបាលជិត ៦០នាក់ ដែលចុះហត្ថលេខាចោទ ស្នងការរូបនេះ ថ្លែងមិនហ៊ានបញ្ចេញឈ្មោះ និងសំឡេង ដោយបារម្ភពីសមត្ថភាពថា ការស៊ើបអង្កេតរបស់ក្រសួងមហាផ្ទៃ ពុំយុត្តិធម៌នោះទេ ថែមទាំងបន្ថែមការឈឺចាប់ដល់ពួកគេទៀត។ លោកសង្ស័យថា ស្នងការខេត្តស្វាយរៀងលោក កឹង ឃន អាចនឹងជះលុយរាប់ម៉ឺនដុល្លារពឹងមន្ត្រីថ្នាក់ជាតិមួយចំនួនឱ្យជួយអន្តរាគមន៍ បិទបាំងរឿងអាស្រូវរបស់ខ្លួន។
អាស៊ីសេរីបានព្យាយាមទាក់ទង អ្នកនាំពាក្យក្រសួងមហាផ្ទៃ លោក ខៀវ សុភ័គ អ្នកនាំពាក្យអង្គភាពប្រឆាំងអំពើពុករលួយ លោក ឱម យ៉ិនទៀង អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ដើម្បីសុំការបំភ្លឺពីលទ្ធផល នៃការស៊ើបអង្កេតនេះ ក៏ប៉ុន្តែទូរស័ព្ទហៅចូលច្រើនដង គ្មានអ្នកទទួល នៅថ្ងៃទី១០ មេសា។ ចំណែកអ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន ក៏មិនអាចទាក់ទងបានដែរ នៅថ្ងៃដដែលនេះ ព្រោះទូរស័ព្ទហៅចូលគ្មានអ្នកលើក។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ យល់ថា លទ្ធផលនៃការស៊ើបអង្កេតនេះ នៅមិនទាន់គ្រប់គ្រាន់ទេ ត្រូវតែមានការចូលរួមពីអង្គភាពប្រឆាំងអំពើពុករលួយ និងស្ថាប័នដទៃទៀត ដែលឯករាជដាច់ដោយឡែកពីក្រសួងមហាផ្ទៃ។ លោកបញ្ជាក់ថា ទម្រង់នៃការស៊ើបអង្កេតរបស់ក្រសួងមហាផ្ទៃ ជាស្ថាប័នសាមី ដែលមានទំនាក់ទំនងស្និទ្ធ ជាមួយថ្នាក់ក្រោម ដែលលោកបារម្ភថា ការស៊ើបអង្កេតនេះ អាចនឹងកើតមានទំនាស់ផលប្រយោជន៍៖ «ខ្ញុំយល់ថា គ្រាន់តែជាស្ថាប័នសាមី ចុះស៊ើបអង្កេតកូនចៅរបស់ខ្លួនមិនទាន់គ្រប់គ្រាន់តែ ទាល់តែមានការស៊ើបអង្កេតរបស់ស្ថាប័ន ជំនាញផ្សេងទៀតឯករាជ អង្គភាពប្រឆាំងអំពើពុករលួយ និងមានអាជ្ញាធរផ្នែកសវនកម្ម»។
អ្នកនាំពាក្យសមាគមការពារសិទ្ធិមនុស្សអាដហុក (ADHOC) លោក សឹង សែនករុណា យល់ថា ពាក្យបណ្ដឹងរបស់នគរបាលទាំង ៥៧នាក់នោះទេ មានខ្លឹមសារខ្លះ ចោទថា លោក កឹង ឃន បាញ់ភរិយាខ្លួនឯង និងនគរបាលម្នាក់ ឱ្យរបួសធ្ងន់ បញ្ជូនទៅព្យាបាលនៅវៀតណាម គឺជាបទល្មើសព្រហ្មទណ្ឌជាក់ស្ដែង ដែលទាមទារឱ្យមន្ត្រីនគរបាលយុត្តិធម៌អនុវត្តច្បាប់ និងស៊ើបអង្កេតឱ្យស៊ីជម្រៅ។ លោកបញ្ជាក់ថា ប្រសិនបើ លោក កឹង ឃន ប្រើអាវុធខុសពីតួនាទី និងក្របខ័ណ្ឌច្បាប់ ជាអំពើខុសច្បាប់មួយកម្រិតទៀត ដែលទាមទារឱ្យថ្នាក់លើចាត់វិធានការ និងផ្ដន្ទាទោសតាមច្បាប់៖ «ជាទូទៅអាវុធ គេប្រើប្រាស់ ក្នុងការបំពេញបេសកកម្ម មិនអាចប្រើអាវុធមកប្រើប្រាស់ រឿងផ្ទាល់ខ្លួន ដើម្បីបញ្ចេញកំហឹង ក្នុងន័យដាក់សម្ពាធទៅភាគី គូទំនាស់របស់ខ្លួន រឿងឯកជនបានទេ។ ព្រោះហ្នឹងជារឿងល្មើសច្បាប់ហើយ ក្នុងការប្រើប្រាស់អាវុធ»។
ថ្មីៗនេះ លោកនាយករដ្ឋមន្ត្រី ហ៊ុន សែន បានព្រមាន មន្ត្រីរាជការរបស់ខ្លួនណា ដែលធ្វើខុស ត្រូវតែទទួលវិន័យ ការអនុវត្តច្បាប់ ដកចេញ និងអនុវត្តអភិក្រមទី៥ ៖ ៖ «មន្ត្រីរាជការណា ដែលធ្វើអំពើផ្ដេសផ្ដាសត្រូវតែទទួលវិន័យ ដែលពួកគេនឹងត្រូវបណ្ដេញចេញ ឬការទទួលវិន័យធ្ងន់ជាងនេះ តាមរយៈ ការផ្ដន្ទាទោសតាមច្បាប់ ពេលនេះ ខ្លាក៏វ៉ៃ ពស់ក៏វ៉ៃ កណ្ដូបក៏វ៉ៃ វ៉ៃទាំងអស់ កុំថាអ្នកឯង ពាក្យផ្កាយ ពាក្យលោកខែ ក៏ខ្ញុំបណ្ដេញចេញ»។
ទោះយ៉ាងណា មន្ត្រីសង្គមស៊ីវិល និងពលរដ្ឋ កំពុងចាំអ៊ុតមើលថា តើការស្រែករបស់លោក ហ៊ុន សែន បែបនេះ មានប្រសិទ្ធភាពឬទេ ខណៈដែលនគរបាលជិត ៦០នាក់ បានប្រថុយ ចុះហត្ថលេខាប្ដឹងជាអនាមិក ដោយស្នើឱ្យដកលោក ស្នងការខេត្តនេះ និងអនុវត្តច្បាប់ជាធរមាន៕ អត្ថបទទាំងស្រុង : www.rfa.org/khmer
មន្ត្រីនគរបាលខេត្តស្វាយរៀងថា លទ្ធផលស្រាវជ្រាវរបស់ក្រសួងមហាផ្ទៃជារឿងអយុត្តិធម៌
Reviewed by Admin
on
Thursday, April 11, 2019
Rating: