ក្រុមគ្រួសារនឹងប្រារព្ធខួប១០០ថ្ងៃជូនកវីនិពន្ធ គង្គ ប៊ុនឈឿន នៅថ្ងៃទី២៧កក្កដា
ក្រុមគ្រួសារសពកវីម្ចាស់បទដងស្ទឹងសង្កែ លោក គង្គ ប៊ុនឈឿន នឹងប្រារព្ធពិធីគម្រប់ខួប ១០០ថ្ងៃ ដើម្បីឧទ្ទិសកុសលផលបុណ្យដល់លោក គង្គ ប៊ុនឈឿន នៅថ្ងៃទី២៧ កក្កដា។
កូនប្រសាកវី គង្គ ប៊ុនឈឿន គឺលោក មុត ថារី។ លោកប្រាប់វិទ្យុអាស៊ីសេរី នៅថ្ងៃទី២៦ ខែកក្កដា ថា កម្មវិធីបុណ្យនេះនឹងប្រារព្ធតាមបែបព្រះពុទ្ធសាសនា ដែលចាប់ផ្ដើមនៅវេលាម៉ោង ២រសៀលក្នុងបុរីវិមានភ្នំពេញថ្មី តាមបណ្ដោយផ្លូវ ជា សុផារ៉ា នៅក្នុងសង្កាត់ច្រាំងចំរេះ ខណ្ឌឫស្សីកែវ រាជធានីភ្នំពេញ។ លោកបន្តថា ក្រុមគ្រួសារស្វាគមន៍ចំពោះវត្តមានប្រជាពលរដ្ឋខ្មែរក្នុងពិធីបុណ្យ ១០០ថ្ងៃ ធ្វើឡើងដើម្បីបង្ហាញពីការដឹងគុណចំពោះស្នាដៃកវីនិពន្ធជើងចាស់ដ៏ឆ្នើមម្នាក់នេះ ដែលបានធ្វើកិច្ចការតែងនិពន្ធដើម្បីប្រយោជន៍ជាតិស្ទើរពេញមួយជីវិតរបស់លោក។
លោក មុត ថារី ថ្លែងបន្តថា «នៅពីយើងមានរៀបក្រុងពាលី សូត្រមន្ត បង្សុកូល រួចហើយបន្ទាប់មកយើងធ្វើធម្មទេសនា ហើយវេលាម៉ោង ៥ល្ងាចយើងចាប់ផ្ដើមជួបជុំពុទ្ធបរិស័ទ។ ចំពោះកម្មវិធីបុណ្យនេះ យើងក៏បើកឲ្យមានការចូលរួមពីសាធារណជនផងដែរ ព្រោះលោក គង្គ ប៊ុនឈឿន បានបន្សល់ទុកស្នាដៃនិពន្ធជាច្រើនសម្រាប់ឲ្យកូនខ្មែរសិក្សាស្វែងយល់»។
លោក គង្គ ប៊ុនឈឿន បានទទួលមរណភាពកាលពីថ្ងៃទី១៧ ខែមេសា ឆ្នាំ២០១៦ ក្នុងវ័យ ៧៧ឆ្នាំនៅប្រទេសន័រវេសន៍ (Norway) ដោយជំងឺមហារីក។ លោកគឺជាកវីនិពន្ធល្បីឈ្មោះមួយរូបតាំងពីទសវត្សរ៍ទី៥០ រហូតមក។ លោកមានជំនាញទាំងផ្នែកបទចម្រៀង ភាពយន្ត និងសិល្បៈមួយចំនួនទៀត។ លោកបានបន្សល់ទុកស្នាដៃនិពន្ធជាច្រើនសម្រាប់ឲ្យកូនខ្មែរសិក្សាស្វែងយល់ ហើយមហាជនក៏តែងស្ងើចសរសើរមិនដាច់ពីមាត់ថា លោកជាកវីនិពន្ធជើងចាស់ដ៏ឆ្នើម ដែលច្រើនសរសេរបង្ហាញអំពីតថភាពពិតនៅក្នុងសង្គមជាតិ៕ អត្ថបទ និង រូបភាព www.rfa.org/khmer
ក្រុមគ្រួសារនឹងប្រារព្ធខួប១០០ថ្ងៃជូនកវីនិពន្ធ គង្គ ប៊ុនឈឿន នៅថ្ងៃទី២៧កក្កដា
Reviewed by Admin
on
Wednesday, July 27, 2016
Rating: