មន្ត្រី គ.ជ.ប អះអាងថាដំណើរការចុះឈ្មោះបោះឆ្នោតឃុំសង្កាត់នឹងប្រព្រឹត្តទៅដោយរលូន
មន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជាក់ជាថ្មីថា ដំណើរការប្រព្រឹត្តទៅនៃការចុះឈ្មោះបោះឆ្នោតក្រុមប្រឹក្សាឃុំ-សង្កាត់សម្រាប់ឆ្នាំ២០១៧ ខាងមុខ នឹងមានភាពរលូន។ មន្ត្រីសង្គមស៊ីវិលគាំទ្រដំណើរការនេះ ប៉ុន្តែយល់ថា ស្ថានការណ៍នយោបាយបច្ចុប្បន្នកំពុងតែឡើងកម្ដៅ និងទាមទារឲ្យមានការស្ដារឡើងវិញ ដើម្បីឲ្យការប្រកួតប្រជែងមានភាពត្រឹមត្រូវ និងយុត្តិធម៌។
ដំណើរការចុះឈ្មោះបោះឆ្នោតក្រុមប្រឹក្សាឃុំ-សង្កាត់របស់ គ.ជ.ប នឹងប្រព្រឹត្តទៅតាមការគ្រោងទុក នេះបើតាមការអះអាងរបស់មន្ត្រីជាន់ខ្ពស់ គ.ជ.ប។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា មានប្រសាសន៍ថា តាមប្រតិទិនដែលជាគម្រោងរបស់ គ.ជ.ប ពុំមានការប្រែប្រួលនោះទេ។ ដោយឡែក គ.ជ.ប កំពុងរង់ចាំការសន្យាផ្គត់ផ្គង់ និងផ្ដល់សម្ភារៈសម្រាប់ដំណើរការបោះឆ្នោតនេះពីសហគមន៍អឺរ៉ុប ដែលមានទឹកប្រាក់សរុប ៦,៧លានអឺរ៉ូ ឬប្រហែលជិត ១០លានដុល្លារអាមេរិក តាមរយៈអង្គការដែលហៅកាត់ថា យូ.អិន.ណុប (UNOPS)។ លោកថា នៅថ្ងៃទី៣១ ខែកក្កដា គ.ជ.ប នឹងទទួលបានសម្ភារៈគ្រប់គ្រាន់៖ «ប្រតិទិន គឺតាមការគ្រោងទុកទាំងអស់ គឺអត់មានប្រែប្រួលទេ។ រើសបណ្ដើរ រៀបចំបណ្ដុះបណ្ដាលបណ្ដើរ ហើយឯកសារផ្សេងៗកំពុងតែផលិតដើម្បីផ្សព្វផ្សាយ។ នៅថ្ងៃទី១០ ខែសីហា នឹងប្រកាសផ្សព្វផ្សាយ ហើយយើងនឹងឃើញមានបេនណើស្ពត (Banner) ពាណិជ្ជកម្មនៅគ្រប់ទីកន្លែង»។
ប្រតិទិននៃការចុះឈ្មោះបោះឆ្នោតឆ្នាំ២០១៦ ដែលចេញផ្សាយដោយ គ.ជ.ប បានបង្ហាញថា ការចាប់ផ្ដើមចុះឈ្មោះបោះឆ្នោតនៅតាមឃុំ-សង្កាត់ នឹងចាប់ផ្ដើមឡើងនៅថ្ងៃទី១ ខែកញ្ញា ហើយបញ្ចប់ទៅវិញនៅថ្ងៃទី២៩ ខែវិច្ឆិកា ឆ្នាំ២០១៦។ ចំណែកឯការប្ដឹងតវ៉ា និងការបដិសេធទៅនឹងការសុំចុះឈ្មោះទៅក្រុមប្រឹក្សាឃុំ និងសង្កាត់នេះ មានរយៈពេល ៣ថ្ងៃ គឺគិតចាប់ពីថ្ងៃទី៣០ ខែវិច្ឆិកា ដល់ថ្ងៃទី២ ខែធ្នូ ឆ្នាំ២០១៦។
ប្រតិទិន គ.ជ.ប កាលពីចុងខែមិថុនា បានបង្ហាញថា ការជូនដំណឹងពីការចុះឈ្មោះ គឺនឹងត្រូវចាប់ផ្ដើមធ្វើឡើងនៅថ្ងៃទី១ ដល់ថ្ងៃទី៣១ ខែសីហា ឆ្នាំ២០១៦។ ការបិទផ្សាយបញ្ជីទីតាំងការិយាល័យចុះឈ្មោះ និងការិយាល័យបោះឆ្នោត នឹងធ្វើតែមួយថ្ងៃទេ គឺថ្ងៃទី២២ ខែសីហា ឆ្នាំ២០១៦។ រីឯការបិទផ្សាយបញ្ជីបោះឆ្នោតដំបូងនៃឃុំ-សង្កាត់ទូទាំងប្រទេស គឺធ្វើឡើងនៅថ្ងៃទី៣ ខែមករា ឆ្នាំ២០១៧ ហើយការប្ដឹងតវ៉ា ឬប្ដឹងជំទាស់លើបញ្ជីបោះឆ្នោតដំបូងទៅក្រុមប្រឹក្សាឃុំ-សង្កាត់វិញ មានរយៈពេល ១០ថ្ងៃ គឺចាប់ពីថ្ងៃទី៤ ដល់ថ្ងៃទី១៤ ខែមករា ឆ្នាំ២០១៧។ ការដោះស្រាយបណ្ដឹងដោយ គ.ជ.ប មានរយៈពេល ៥ថ្ងៃ គឺចាប់ពីថ្ងៃទី២២ ដល់ថ្ងៃទី២៧ ខែមករា ឆ្នាំ២០១៧។ នៅចុងក្រោយនៃនីតិវិធី គឺការផ្ដល់សុពលភាព និងប្រកាសផ្សាយបញ្ជីបោះឆ្នោតដោយ គ.ជ.ប នឹងត្រូវបិទបញ្ចប់ត្រឹមថ្ងៃទី១២ ខែកុម្ភៈ ឆ្នាំ២០១៧។
នៅថ្ងៃទី២៦ ខែកក្កដា គ.ជ.ប ក៏បានប្រកាសជ្រើសរើសក្រុមចុះឈ្មោះបោះឆ្នោតចំនួន ៦.១០៣នាក់ ជាមន្ត្រីជាប់កិច្ចសន្យារយៈពេលខ្លី ដើម្បីបម្រើការងារតាមឃុំ សង្កាត់ រាជធានី ខេត្ត សម្រាប់ចុះឈ្មោះបោះឆ្នោតដើម្បីរៀបចំបញ្ជីបោះឆ្នោតថ្មីឆ្នាំ២០១៦ មានមុខតំណែងជាប្រធានក្រុមចុះឈ្មោះបោះឆ្នោត សមាជិក គ.ជ.ប ជាជំនួយការអនុប្រធាន និងសមាជិក គ.ជ.ប ជាការីកុំព្យូទ័រ និងស្មៀនឃុំចំនួន ១.៦៣៣នាក់។
បើទោះជាមានការអះអាងយ៉ាងនេះក្ដី នាយកប្រតិបត្តិគណៈកម្មាធិការខុមហ្វ្រែល (Comfrel) លោក គល់ បញ្ញា មានទស្សនៈថា ការខិតខំប្រឹងប្រែងចាត់ចែងការងារត្រៀមលក្ខណៈដើម្បីធានាការបោះឆ្នោត គឺជារឿងមួយត្រឹមត្រូវ ប៉ុន្តែអ្វីដែលចោទជាបញ្ហានេះ គឺបរិយាកាសមានបញ្ហាច្រើន ដែលបានកើតមានឡើងនៅមុនពេលបោះឆ្នោតនេះ ដូចជាការបំភិតបំភ័យ ការគំរាមកំហែង សុវត្ថិភាពប៉ះពាល់មន្ត្រី គ.ជ.ប ម្ចាស់ឆ្នោត គណបក្សប្រឆាំង មានការភ័យខ្លាចនាំឲ្យមានឧបសគ្គច្រើននៅលើទីលានប្រកួត ដែលមិនអាចធ្វើសកម្មភាពនយោបាយបានពេញលេញ។
ទាក់ទងទៅនឹងដំណើរការបោះឆ្នោតក្រុមប្រឹក្សាឃុំ-សង្កាត់នេះដែរ នៅថ្ងៃទី២៥ ខែកក្កដា គណៈកម្មាធិការអចិន្ត្រៃយ៍នៃគណបក្សសង្គ្រោះជាតិ បានបើកកិច្ចប្រជុំដោយកំណត់យកផែនការយុទ្ធសាស្ត្រ សកម្មភាពក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់។ គណៈកម្មាធិការនេះបានសម្រេចឲ្យគណបក្ស ប្រកាសជាសាធារណៈឲ្យមានការដាក់ពាក្យស្នើសុំឈរឈ្មោះជាបេក្ខជនសម្រាប់ការបោះឆ្នោតក្រុមប្រឹក្សាឃុំ-សង្កាត់ឲ្យបានទូលំទូលាយ ហើយឲ្យក្រុមប្រឹក្សារាជធានី-ខេត្ត គណៈកម្មាធិការប្រតិបត្តិថ្នាក់ក្រោមជាតិ រៀបចំភ្នាក់ងារគណបក្ស និងបណ្ដុះបណ្ដាលសម្រាប់កិច្ចការបោះឆ្នោត ជំរុញលើកទឹកចិត្តប្រជាពលរដ្ឋទៅធ្វើអត្តសញ្ញាណប័ណ្ណសញ្ជាតិខ្មែរ និងជំរុញលើកទឹកចិត្តប្រជាពលរដ្ឋទៅចុះឈ្មោះបោះឆ្នោត៕ អត្ថបទ និង រូបភាព www.rfa.org/khmer
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត ថ្លែងបន្ទាប់ពីកិច្ចប្រជុំ នៅថ្ងៃទី៤ ខែឧសភា ឆ្នាំ២០១៥។ |
មន្ត្រី គ.ជ.ប អះអាងថាដំណើរការចុះឈ្មោះបោះឆ្នោតឃុំសង្កាត់នឹងប្រព្រឹត្តទៅដោយរលូន
Reviewed by Admin
on
Wednesday, July 27, 2016
Rating: