គណៈកម្មាធិការមួយនៅកាណាដាទាមទារឲ្យពលរដ្ឋខ្មែរនៅក្រៅប្រទេសមានសិទ្ធិបោះឆ្នោត

គណៈកម្មាធិការដើម្បីសិទ្ធិបោះឆ្នោតរបស់ខ្មែរនៅក្រៅប្រទេស (the CEROC) អំពាវនាវឲ្យគណៈកម្មាធិការជាតិរៀបចំការបោះឆ្នោត (គ.ជ.ប) ជួយសម្រួលដល់ការចុះឈ្មោះបោះឆ្នោតរបស់ពលរដ្ឋខ្មែរដែលកំពុងរស់នៅក្រៅប្រទេសឲ្យមានសិទ្ធិបោះឆ្នោតដូចខ្មែរក្នុងស្រុកដែរ។

គណៈកម្មាធិការនេះ អះអាងថា ប្រទេសប្រជាធិបតេយ្យជាច្រើននៅលើពិភពលោក បានអនុញ្ញាតឲ្យពលរដ្ឋរបស់ខ្លួន រួមមានពលករចំណាកស្រុក និងពលរដ្ឋដែលកំពុងរស់នៅអចិន្ត្រៃយ៍នៅក្រៅប្រទេសផង មានសិទ្ធិបោះឆ្នោតជ្រើសរើសមេដឹកនាំនៅប្រទេសកំណើតរបស់ពួកគេបាន។

អង្គការដដែលនេះ រកឃើញទៀតថា សព្វថ្ងៃមានប្រជាពលរដ្ឋខ្មែរនៅក្រៅស្រុក រួមទាំងពលករចំណាកស្រុកផង ប្រមាណជាង ១លាននាក់។

ពាក់ព័ន្ធនឹងការចុះឈ្មោះបោះឆ្នោតសម្រាប់ពលរដ្ឋខ្មែរដែលរស់នៅក្រៅប្រទេសនេះ កន្លងមកមានអង្គការសង្គមស៊ីវិល គណបក្សប្រឆាំង និងពលរដ្ឋសហគមន៍ខ្មែរនៅក្រៅប្រទេស ធ្លាប់លើកឡើងពីបញ្ហានេះដែរ។ ប៉ុន្តែលោក ហង្ស ពុទ្ធា ធ្លាប់ប្រាប់អ្នកសារព័ត៌មានថា ទាល់តែធ្វើវិសោធនកម្មច្បាប់បោះឆ្នោតបច្ចុប្បន្ន ទើបអាចអនុញ្ញាតឲ្យខ្មែរក្រៅស្រុកបោះឆ្នោតបាន។

លោក ហង្ស ពុទ្ធា គូសបញ្ជាក់ថា ច្បាប់ គ.ជ.ប បច្ចុប្បន្ន មិនតម្រូវឲ្យ គ.ជ.ប រៀបចំការិយាល័យបោះឆ្នោតនៅក្រៅប្រទេសនោះទេ។ ច្បាប់បោះឆ្នោតចែងថា ប្រជាពលរដ្ឋខ្មែរត្រូវទៅចុះឈ្មោះនៅមណ្ឌលបោះឆ្នោតក្នុងភូមិសង្កាត់ដែលពួកគាត់រស់នៅ។ ប្រសិនបើយើងបង្កើតការិយាល័យបោះឆ្នោតនៅតាមស្ថានកុងស៊ុល ឬស្ថានទូតខ្មែរនៅបរទេស កន្លែងនោះមិនមែនជាឃុំសង្កាត់ ដែលពួកគាត់រស់នៅនោះឡើយ។

បើទោះជាមានភាពចម្រូងចម្រាសយ៉ាងណាក្តី ច្បាប់បោះឆ្នោតថ្មីនេះ ត្រូវបានសភាដែលមានអ្នកតំណាងរាស្ត្រមកពីគណបក្សជាប់ឆ្នោតទាំងពីរអនុម័តកាលពីថ្ងៃទី១៩ ខែមីនា ឆ្នាំ២០១៥ រួចហើយ ហើយមិនមានមាត្រាណាមួយចែងអនុញ្ញាតឲ្យពលរដ្ឋខ្មែរក្រៅប្រទេសមានសិទ្ធិបោះឆ្នោតនោះទេ។

ជុំវិញការចុះឈ្មោះបោះឆ្នោតសម្រាប់ពលករចំណាកស្រុកនេះ គណបក្សប្រឆាំងបានស្នើសុំឲ្យ គ.ជ.ប ជួយសម្រួលដល់ពលករចំណាកស្រុកចុះឈ្មោះឲ្យបានច្រើនសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ ពិសេសក្នុងរដូវបុណ្យភ្ជុំបិណ្ឌខាងមុខនេះ។ ឆ្លើយតបទៅនឹងសំណើនេះ កាលពីថ្ងៃទី៣០ ខែកក្កដា លោក ហង្ស ពុទ្ធា មានប្រសាសន៍ថា គ.ជ.ប នឹងពិចារណា។

គ.ជ.ប បានរៀបចំប្រតិទិនសម្រាប់ការងារចុះឈ្មោះមានរយៈពេល ៣ខែ ចាប់ពីថ្ងៃទី១ ខែកញ្ញា រហូតដល់២៩ ខែវិច្ឆិកា ឆ្នាំ២០១៦៕

អត្ថបទ និង រូបភាព www.rfa.org/khmer