ពលរដ្ឋមួយចំនួននៅក្រុងប៉ោយប៉ែតរិះគន់អាជ្ញាធរក្រុងថាគ្មានផែនការរំដោះជំនន់ទឹកភ្លៀង

ប្រជាពលរដ្ឋមួយចំនួននៅក្រុងប៉ោយប៉ែត ខេត្តបន្ទាយមានជ័យ រិះគន់អាជ្ញាធរក្រុងនេះថាគ្មានវិធានការសង់ប្រព័ន្ធលូបង្ហូរទឹកតាមដងផ្លូវឲ្យបានត្រឹមត្រូវ ដើម្បីរំដោះទឹកភ្លៀងចេញពីផ្លូវឲ្យឆាប់រហ័សនោះទេ។ អ្នកភូមិបញ្ជាក់ថា នៅពេលមានភ្លៀងធ្លាក់ម្ដងៗ ទឹកតែងឡើងលិចផ្លូវ លិចសាលារៀន និងមានក្លិនស្អុយតាមដងផ្លូវ ហើយបង្កការលំបាកដល់ការធ្វើដំណើរជាប្រចាំ។ ប៉ុន្តែអភិបាលរងក្រុងបញ្ជាក់ថា មូលហេតុដែលមានជំនន់ទឹកភ្លៀងនៅក្នុងរដូវវស្សា ដោយសារការរីកចម្រើនផ្នែកសំណង់ឆាប់រហ័សជាងការអភិវឌ្ឍផ្លូវថ្នល់។

ប្រជាពលរដ្ឋ និងអង្គការសង្គមស៊ីវិលនៅខេត្តបន្ទាយមានជ័យ លើកឡើងថា ប្រសិនបើអាជ្ញាធរមានផែនការអភិវឌ្ឍន៍ហេដ្ឋារចនាសម្ព័ន្ធត្រឹមត្រូវនោះ ជំនន់ទឹកភ្លៀងនឹងមិនលិចផ្លូវក្រុងប៉ោយប៉ែត ឡើយ។

ពលរដ្ឋនៅសង្កាត់ប៉ោយប៉ែត មួយចំនួន ឲ្យដឹងនៅថ្ងៃទី២៥ កក្កដា ថា បើទោះជាផ្លូវមួយចំនួននៅក្រុងប៉ោយប៉ែត មានចាក់បេតុង និងក្រាលកៅស៊ូខ្លះក៏ដោយ ក៏ប៉ុន្តែនៅពេលមានភ្លៀងធំល្មមចាប់ពី ១៥នាទីឡើងទៅ គឺជំនន់ទឹកភ្លៀងនឹងឡើងលិចតាមដងផ្លូវ ដូចជាផ្លូវជាតិលេខ៥ ម្ដុំរង្វង់មូលច្រកទ្វារអន្តរជាតិប៉ោយប៉ែត និងផ្លូវមួយចំនួនទៀតនៅក្រុងជាមិនខាន។ អ្នកភូមិបញ្ជាក់ថា ប្រសិនបើមានភ្លៀងចាប់ពីកន្លះម៉ោងទៅ ទឹកនឹងលិចសាលារៀននៅវត្តប៉ាលេលិយ្យ បណ្ដាលឲ្យក្មេងមិនអាចទៅរៀនបានឡើយ។

ជាងនេះទៅទៀត អ្នកភូមិថានៅពេលទឹកស្រកទៅវិញ មានជះក្លិនស្អុយតាមដងផ្លូវ ធ្វើឲ្យប៉ះពាល់ដល់ការធ្វើដំណើររបស់ភ្ញៀវទេសចរ និងប្រជាពលរដ្ឋនៅក្រុងប៉ោយប៉ែត យ៉ាងខ្លាំង៖ «កាលពីមុនមានទឹកលិចខ្លះដែរ ប៉ុន្តែក្រោយពីភ្លៀងហើយ ទឹកស្រកវិញ។ ឥឡូវពេលមានភ្លៀង ទឹកលិចរយៈពេលយូរមែនទែន ហើយគ្មានអាជ្ញាធរណាមកអន្តរាគមន៍នោះទេ។ ភ្លៀងមិនជាធំអីប៉ុន្មានទេ ក៏ប៉ុន្តែគ្មានប្រព័ន្ធលូបង្ហូរទឹកទម្លាក់ទៅអូរព្រំដែន។ ម្យ៉ាងទៀត ការអភិវឌ្ឍផ្លូវថ្នល់នៅក្រុងប៉ោយប៉ែត នេះ មិនមែនជាថវិការបស់រដ្ឋទេ គឺជាថវិកាបានពីប្រជាពលរដ្ឋរស់នៅតាមដងផ្លូវ»។

ឆ្លើយតបនឹងបញ្ហានេះ អភិបាលរងក្រុងប៉ោយប៉ែត លោក ម៉ែន សុភ័ណ ទទួលស្គាល់ថា ពិតជាមានជំនន់ទឹកភ្លៀងលិចតាមដងផ្លូវ និងលិចសាលាខ្លះនៅពេលមានភ្លៀងធំប្រាកដមែន។ លោកអះអាងថា កត្តាដែលបណ្ដាលឲ្យទឹកលិច ដោយសារសំណង់អគារនៅក្រុងប៉ោយប៉ែត រីកចម្រើនឆាប់រហ័សជាងការអភិវឌ្ឍផ្លូវថ្នល់របស់រដ្ឋ ពីព្រោះលោកបញ្ជាក់ថា ប្រព័ន្ធលូមានចំពោះតែផ្លូវដែលចាក់បេតុង និងក្រាលកៅស៊ូ៖ «បញ្ហានេះដោយសារស្ទះលូបង្ហូរទឹក ធ្វើចរន្តទឹកភ្លៀងច្រើនហូរមិនទាន់។ តែឥឡូវ យើងកំពុងតែស្ដារកន្លែងណាដែលស្ទះ ហើយយើងធ្វើទៅតាមលទ្ធភាពថវិកា»។

ទោះបីជាងយ៉ាងនេះក្ដី មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា កត្តាដែលបណ្ដាលឲ្យជំនន់ទឹកភ្លៀងលិចផ្លូវ ដោយសារអាជ្ញាធរក្រុងគ្មានផែនការអភិវឌ្ឍន៍ច្បាស់លាស់ ឬការអភិវឌ្ឍបែបអង្ករកំប៉ុងជាដើម៖ «មុននឹងអភិវឌ្ឍអ្វី គេត្រូវសិក្សាឲ្យបានល្អិតល្អន់ជាមុនសិន មិនមែនដល់ថ្ងៃស្ទះលូហើយ បាននាំគ្នាទៅពិនិត្យមើល ដើម្បីថតយកសកម្មភាពការងាររបស់ខ្លួននោះ ជារឿងមិនល្អឡើយ»។

នៅក្រុងប៉ោយប៉ែត មានប្រជាពលរដ្ឋរស់នៅប្រមាណ ១០ម៉ឺននាក់ និងមានសង្កាត់ចំនួន៣ គឺសង្កាត់និមិត្ត សង្កាត់ផ្សារកណ្ដាល និងសង្កាត់ប៉ោយប៉ែត៕

ប្រភពពី www.rfa.org/khmer