ព្រឹទ្ធសភាកម្ពុជាឯកភាពទាំងស្រុងលើការកែច្បាប់បើកផ្លូវឲ្យមន្រ្តីអតីតបក្សប្រឆាំងបានធ្វើនយោបាយឡើងវិញ
ព្រឹទ្ធសភាកម្ពុជានៅព្រឹកថ្ងៃអង្គារនេះ បានយល់ព្រមទាំងស្រុងលើសេចក្តីស្នើច្បាប់ស្តីពីវិសោធនកម្មច្បាប់ បក្សនយោបាយដែលឈានទៅបើកផ្លូវឲ្យមន្រ្តីអតីតគណបក្សសង្រ្គោះជាតិបានធ្វើនយោបាយឡើងវិញ។ ក្រោយយល់ព្រមភ្លាម ព្រឹទ្ធសភាក៏បានបញ្ជូនសេចក្តីស្នើវិសោធនកម្មច្បាប់នេះមកកាន់រដ្ឋសភាវិញ ហើយរដ្ឋសភានឹងបញ្ជូនទៅកាន់ក្រុមប្រឹក្សាធម្មនុញ្ញនៅល្ងាចនេះ។
អ្នកនាំពាក្យរដ្ឋសភាជាតិកម្ពុជា លោកឡេង ប៉េងឡុង យល់ថា ក្រុមប្រឹក្សាធម្មនុញ្ញប្រហែលនឹងមិនប្រើពេលយូរទេក្នុងការពិនិត្យសេចក្តីស្នើវិសោធនកម្មច្បាប់ស្តីពីគណបក្សនយោបាយ ដើម្បីឆាប់បានបញ្ជូនត្រឡប់មកកាន់រដ្ឋសភាវិញ។ តាមនីតិវិធី បន្ទាប់ពីក្រុមប្រឹក្សាធម្មនុញ្ញពិនិត្យពីធម្មនុញ្ញភាពរួចហើយ នឹងបញ្ជូនត្រឡប់មកកាន់រដ្ឋសភាៗនឹងបញ្ជូនបន្តមកកាន់រាជរដ្ឋាភិបាលកម្ពុជា ដើម្បីថ្វាយទៅកាន់ព្រះមហាក្សត្រឡាយព្រះហត្ថលេខាប្រកាសឲ្យប្រើប្រាស់ជាផ្លូវការ។ លោកឡេង ប៉េងឡុង បានបង្ហើបឲ្យដឹងថា សេចក្តីស្នើវិសោធនកម្មច្បាប់ស្តីពីគណបក្សនយោបាយនេះ ប្រហែលអាចនឹងត្រូវដាក់ឲ្យប្រើប្រាស់នៅចុងឆ្នាំ២០១៨នេះ។
សូមបញ្ជាក់ថា សេចក្តីស្នើវិសោធនកម្មច្បាប់គណបក្សនយោបាយ ត្រូវបានស្នើឡើងដោយតំណាងរាស្រ្តគណបក្សប្រជាជនកម្ពុជាចំនួន៨៧រូប។ ក្រុមតំណាងរាស្រ្ត បានស្នើឲ្យធ្វើការកែប្រែលើមាត្រា៤៥ថ្មី (ស្ទួន)នៃច្បាប់ស្តីពីគណបក្សនយោបាយ ដោយបន្ថែមនូវខ្លឹមសារថ្មីថា «បុគ្គលដែលត្រូវបានតុលាការសម្រេចហាមឃាត់ការធ្វើសកម្មភាពនយោបាយ នឹងអាចទទួលបានវិញនូវសិទ្ធិនយោបាយពេញលេញដោយពេញច្បាប់ បន្ទាប់ពីផុតរយៈពេលនៃការហាមឃាត់ដែលកំណត់ដោយសាលដីការបស់តុលាការកំពូល ឬក្នុងករណីដែលបុគ្គលនោះត្រូវបានផ្តល់នីតិសម្បទាឡើងវិញដោយព្រះមហាក្សត្រ តាមសំណើរបស់នាយករដ្ឋមន្រ្តី តាមសេចក្តីស្នើសុំរបស់រដ្ឋមន្រ្តីក្រសួងមហាផ្ទៃ»។
ក៏ប៉ុន្តែដើម្បីទទួលបាននីតិសម្បទាឡើងវិញនេះ លោកនាយករដ្ឋមន្រ្តីហ៊ុន សែន បានតម្រូវឲ្យពួកគេត្រូវធ្វើសំណើផ្លូវការមកកាន់រដ្ឋមន្រ្តីក្រសួងមហាផ្ទៃ។ ក្រសួងមហាផ្ទៃ តាមរយៈលោកខៀវ សុភ័គ ដែលជាអ្នកនាំពាក្យបានអះអាងថា អ្នកដែលនឹងត្រូវក្រសួងមហាផ្ទៃសម្រេចដាក់ក្នុងបញ្ជីស្នើសុំលើកលែងបម្រាមធ្វើនយោបាយនោះ គឺទាល់តែពួកគេអនុវត្តតាមសាលដីការបស់តុលាការកំពូល។ លោកខៀវ សុភ័គ បានសង្កត់ធ្ងន់ថា មន្រ្តីអតីតគណបក្សសង្រ្គោះជាតិទាំង១១៨រូបមិនអាចស្នើសុំលើកលែងការហាមឃាត់សិទ្ធិធ្វើនយោបាយទាំងអស់បាននោះទេ ព្រោះលោកកត់សម្គាល់ថា មានមន្រ្តីមួយចំនួនបានអនុវត្តប្រឆាំងនឹងសាលដីការបស់តុលាការកំពូលកម្ពុជា ដូចយ៉ាង លោកអេង ឆៃអ៊ាង និងលោកស្រីមួរ សុខហួរជាដើមដែលសុទ្ធតែជាអនុប្រធានអតីតគណបក្សសង្រ្គោះជាតិ៕អត្ថបទ និង រូបភាព khmer.rfi.fr
 |
| កិច្ចប្រជុំព្រឹទ្ធសភាកម្ពុជានាពេលកន្លងមក (រូបភាពឯកសារ) |
ព្រឹទ្ធសភាកម្ពុជាឯកភាពទាំងស្រុងលើការកែច្បាប់បើកផ្លូវឲ្យមន្រ្តីអតីតបក្សប្រឆាំងបានធ្វើនយោបាយឡើងវិញ
Reviewed by Admin
on
Tuesday, December 25, 2018
Rating:
Reviewed by Admin
on
Tuesday, December 25, 2018
Rating:
